പിരിമുറുക്കം കുറയ്ക്കാൻ വായന

ഒരിക്കലെങ്കിലും ടെൻഷൻ അനുഭവിക്കാത്തവരായി ആരും ഉണ്ടാകില്ല.നമുക്കെല്ലാം മാനസിക പിരിമുറുക്കം ഉണ്ടാവാം.പക്ഷെ അതെങ്ങനെ മറികടക്കും?? മനസിനെ തഴുകി തലോടുന്ന ഒരു മൃദു ഗാനം ഒരുപക്ഷേ മരുന്നായി പ്രവർത്തിച്ചേക്കാം.എന്നാൽ ഇതിനേക്കാൾ നല്ലൊരു 'ടെൻഷൻ കൊല്ലി' മരുന്നുണ്ട് എന്നാണ് ഗവേഷകർ പറയുന്നത്...
പിരിമുറുക്കം കുറയ്ക്കാനുള്ള ഏറ്റവും നല്ല മരുന്ന് വായനയാണെന്നാണ് കണ്ടെത്തൽ.ആറു മിനിറ്റ് നേരത്തെ വായന നിങ്ങളുടെ മാനസിക പിരിമുറുക്കം മൂന്നിലൊന്നായി കുറയ്ക്കുമത്രെ!! മനസ് പൂർണ്ണമായും വായനയിൽ കേന്ദ്രീകരിക്കുന്നതാണ് പിരിമുറുക്കത്തെ  ദൂരെ നിർത്താൻ സഹായിക്കുന്നത്. വായനയുടെ ലോകത്തിലൂടെ വിഹരിക്കുമ്പോൾ മസിലുകളിലെയും ഹൃദയത്തിലെയും പിരിമുറുക്കം കുറയാൻ കാരണമാവുമെന്നു ഗവേഷക സംഘം പറയുന്നു..
ഗ്രന്ഥകർത്താവിന്റെ ഭാവനയിൽ വായനക്കാർ മുഴുകുന്ന അവസ്ഥയ്ക്ക് മറ്റൊരു പ്രയോജനം കൂടി ഉണ്ടെന്നു ഗവേഷകർ ചൂണ്ടിക്കാട്ടുന്നു. വായനയിൽ മുഴുകുമ്പോൾ ഗ്രന്ഥകർത്താവിന്റെ ഭാവനാ ലോകത്തിനു സമാനമായ ലോകം വായനക്കാർ സ്വയം സൃഷ്ടിക്കുന്നു.ഇത് സൃഷ്ടിപരമായ കഴിവുകളെ കൂടുതൽ ഉദ്ധീപിപ്പിക്കാൻ സഹായിക്കുന്നു.
പഠനം നടത്തിയവരിൽ  സാമ്പ്രദായികവും
അല്ലാത്തതുമായ രീതികളിലാണ് പിരിമുറുക്കനില പരിശോധിച്ചത്. ആറു മിനിറ്റ് നേരം സ്വസ്ഥമായി വായിച്ചവരിൽ പിരിമുറുക്കനില 68% കുറഞ്ഞതായി റിപ്പോർട്ടുകൾ പറയുന്നു.പാട്ട് കേട്ടവരിൽ 61% വും കാപ്പി ,ചായ എന്നിവയ്ക്കു 54% വും നടത്തത്തിന് 42% വും വീഡിയോ ഗെയിം കളിച്ചവരിൽ 21% വും പിരിമുറുക്കനില കുറയുകയുണ്ടായി.സസെക്‌സ് സർവകലാശാലയിൽ Mind Lab International എന്ന കൺസൾട്ടൻസി ആണ് പഠനം നടത്തിയത്.